ღვიძლისმიერი ენცეფალოპათია - ახალი ტიპის მკურნალობა

პოლიეთილენგლიკოლი

რანდომიზებული კონტროლირებადი კვლევების მტკიცებულებები მიუთითებს, რომ პოლიეთილენგლიკოლი და ლაქტულოზა შეიძლება ანალოგიურად ეფექტური იყოს მწვავე ღვიძლისმიერი ენცეფალოპათიის (HE) სამართავად.[44][45] საჭიროა შემდგომი კვლევები, სანამ შესაძლებელი იქნება ამ მკურნალობის რეკომენდება რუტინულად გამოყენებისთვის.

ექსტრაკორპორალური ალბუმინის დიალიზი

ექსტრაკორპორალური ალბუმინური დიალიზი (ECAD) წარმოადგენს ღვიძლის მხარდამჭერ ხელოვნურ სისტემას, რომელიც ახორციელებს სისხლის დიალიზს ალბუმინით გამდიდრებული დიალიზატით ალბუმინთან ბმული ტოქსინების და ასევე ბილირუბინის, არომატული ამინომჟავების და წყალში ხსნადი ნივთიერებების მოსაცილებლად. ECAD რანდომიზებული კონტროლირებადი კვლევები მიუთითებს HE გაუმჯობესებაზე და 30-დღიან გადარჩენაზე, ჩვეულებრივ მკურნალობასთან შედარებით.[46][47] ეს თერაპია საკვლევია და არ არის ფართოდ ხელმისაწვდომი.

პრობიოტიკები

კოჰრეინის მიმოხილვამ დაადგინა, რომ პრობიოტიკები, სავარაუდოდ, აუმჯობესებს ღვიძლისმიერი ენცეფალოპათიისგან გამოჯანმრთელებას, მაგრამ პლაცებოსთან ან არ ჩარევასთან შედარებით, მცირე ან არანაირ განსხვავებას იწვევს ყველა მიზეზით სიკვდილიანობის მხრივ.[48] მიმოხილვამ ვერ დაადგინა, უფრო ეფექტურია თუ არა პრობიოტიკები, ვიდრე ლაქტულოზა, ღვიძლისმიერი ენცეფალოპათიის დროს. ჩართული კვლევები სისტემური ცდომილების და რანდომული ცდომილების (ანუ, დაბალი ხარისხი) მაღალი რისკის ქვეშ იყო.[48] [ ]

ფეკალური მიკროფლორის ტრანსპლანტატი

HE მქონე პაციენტებს ნაწლავის შეცვლილი მიკრობიომი აქვთ, სასარგებლო ბაქტერიების შემცირებით და პოტენციურად პათოგენური ბაქტერიების მომატებით. ერთი ღია რანდომიზებული კვლევით (n = 20) შედარებული იყო ფეკალური მიკრობიოტის ტრანსპლანტაცია ჩვეულებრივ მკურნალობასთან.[49] დონორის მასალაში მრავლად იყო Lachnospiraceae და Ruminococcaceae: ეს ბაქტერიები წარმოქმნიან მოკლე ჯაჭვულ ცხიმოვან მჟავებს, რაც ხელს უწყობს ნაწლავური ბარიერის ნორმალურ ფუნქციონირებას. ფეკალური მიკრობიოტას ტრანსპლანტაციის ჯგუფში ჰოსპიტალიზაციის ნაკლები შმთხვევები იყო, ვიდრე ჩვეულებრივ სამკურნალო ჯგუფში, განსაკუთრებით პორტული ჰიპერტენზიული გართულებების გამო. ფეკალური მიკრობიოტას ტრანსპლანტაციის ჯგუფმა აჩვენა კოგნიტური ფუნქციის ქულების გაუმჯობესება საწყისი დონიდან ტრანსპლანტაციის შემდეგ. ფეკალური მიკრობიოტას ტრანსპლანტაციის ჯგუფში ბაქტერიული ინფექციების მატება არ შეინიშნებოდა. 1-ლი ფაზის კლინიკურმა კვლევამ აჩვენა, რომ ფეკალური მიკრობიოტა უსაფრთხოა და კარგად აიტანება პაციენტებში, რომლებსაც აქვთ განმეორებითი ღვიძლისმიერი ენცეფალოპათია და უკავშირდება თორმეტგოჯა ნაწლავის ლორწოვანას ბაქტერიული მრავალფეროვნების გაუმჯობესებას.[50]

L-ორნიტინის ფენილაცეტატი

ამიაკის შთანმთქმელები, როგორიცაა L-ორნიტინ ფენილაცეტატი (OPA), უზრუნველყოფს ალტერნატიულ გზას შარდოვანასთვის, აზოტის ნარჩენების გამოსაყოფად. L-ორნიტინი მოქმედებს, როგორც სუბსტრატი გლუტამინის სინთეზისთვის ამიაკიდან და შედეგად მიღებული გლუტამინი კონიუგირდება და გამოიყოფა შარდში ფენილაცეტილგლუტამინის სახით.[51] მცირე ზომის ღია კვლევამ აჩვენა, რომ OPA უსაფრთხოა და კარგად აიტანება დეკომპენსირებული ციროზის მქონე პაციენტებში. სამკურნალო ჯგუფში შემცირდა პლაზმის ამიაკი და გაიზარდა შარდის ფენილაცეტატის ექსკრეცია.[52] კოჰრეინის მიმოხილვამ დაასკვნა, რომ ამჟამად არ არსებობს საკმარისი მტკიცებულებები, რათა განსაზღვროს ამონიუმის შთანმთქმელების ეფექტები ღვიძლისმიერი ენცეფალოპათიის პროფილაქტიკასა და მკურნალობაზე ციროზის მქონე მოზრდილებში.[53]