ეპიდემიოლოგია

აშშ-ში ინფექციური მონონუკლეოზის ყოველწლიური ინციდენტობაა დაახლოებით 500 შემთხვევა ყოველ 100 000 მოსახლეზე. ყველაზე ხშირია 15-24 წლის ასაკობრივ ჯგუფში. ყოველწლიურად მოწყვლადი მოსახლეობის დაახლოებით 10-20% ინფიცირდება ეპშტეინ-ბარის ვირუსით და ინფექციური მონონუკლეოზი უვითარდება ინფიცირებულ პირთა 30-50%-ს.[11]

სხვადასხვა ქვეყნის სეროპრეველანტობის კვლევები თანმიმდევრულად მიუთითებს, რომ გადატანილი ეპშტეინ-ბარის ვირუსული (EBV) ინფექცია აღენიშნება 40 წლის ასაკის მოზრდილთა 90%-ზე მეტს.[12][13][14]

ბრიტანეთში ჩატარებული სეროეპიდემიოლოგიური კვლევის მონაცემებმა აჩვენა, რომ ≤25 წელზე უფროსი ასაკის ადამიანების 85% იყო EBV დადებითი. EBV სეროპოზიტიურობა უფრო სწრაფად გაიზარდა ქალებში, ვიდრე მამაკაცებში მოზარდობის პერიოდში (10-15 წლის ასაკში). IM-ის სიხშირე გაიზარდა 2002 და 2013 წლებში.[15] ინგლისელ ახალგაზრდებში ჩატარებულმა სეროპრევალენტობის კვლევებმა აჩვენა, რომ 11 წლის ასაკისთვის EBV ინფექცია ვლინდებოდა მოსახლეობის ნახევარში. სეროპრევალენტობა იზრდებოდა 60.4%-მდე 11-14 წლის ასაკისთვის, 68.6%-ს აღწევდა 15-18 წლის ასაკში და 93%-ს- 22-24 წლის ასაკში. არათეთრკანიანთა ეთნიკური ჯგუფი და მოწევა ასევე დაკავშირებული იყო ამ მოსახლეობაში ეპშტეინ-ბარის ვირუსის მომატებულ სეროპრევალენტობასთან.[16] აშშ-ში საერთო სეროპრევალენტობა 6-19 წლის ასაკის ბავშვებსა და მოზარდებში იყო 66.5% და სიხშირე იზრდებოდა ასაკის მატებასთან ერთად 54.1%-დან (6-8 წლის ასაკში) 82.9%-მდე (18-19 წლის ასაკში).[17]

განვითარებადი ქვეყნების ბავშვთა უმეტესობა ეპშტეინ-ბარის ვირუსით ინფიცირდება 4 წლამდე ასაკში.[18] განვითარებულ ქვეყნებში პირველადი EBV ინფექცია სიცოცხლის უფრო მოგვიანებით ეტაპზე ვითარდება. კოლეჯის პირველი კურსის სტუდენტთა დაახლოებით 30-75% სერონეგატიურია ეპშტეინ-ბარის ვირუსზე.[19] განვითარებული და ზოგიერთი განვითარებადი ქვეყნის ეპიდემიოლოგიური მონაცემი მიუთითებს, რომ პირველადი EBV ინფექცია ინაცვლებს უფრო ასაკიან პაციენტებში, რაც მოზარდებსა და მოზრდილებში მძიმე ინფექციების უფრო მაღალ მაჩვენებელს განაპირობებს.[20]

ინფექციური მონონუკლეოზის ეპიდაფეთქება იშვიათია, სავარაუდოდ, ეპშტეინ-ბარის ვირუსის ტრანსმისიულობის დაბალი მაჩვენებლიდან გამომდინარე. ინფექციური მონონუკლეოზის ინკუბაციური პერიოდი 30-დან 50 დღემდეა, თუმცა, აღნიშნული მცირეწლოვან ბავშვებში ალბათ, უფრო ხანმოკლეა. არ არსებობს ინფექციის განვითარებისადმი ძლიერი წინასწარგანწყობა სქესის ან რასობრივი კუთვნილების მიხედვით. ინფექციური მონონუკლეოზის ინციდენტობას სეზონურობა არ ახასიათებს.

ამ მასალის გამოყენება ექვემდებარება ჩვენს განცხადებას