ეპიდემიოლოგია

B ჯგუფის სტრეპტოკოკის მტარებლობის სიხშირე განსხვავდება ასაკისა და ეთნიკურობის მიხედვით.[5][6]

ორსული ქალების დაახლოებით 10-30% კოლონიზებულია B ჯგუფის სტრეპტოკოკით სწორ ნაწლავში ან საშოში; ჩარევის გარეშე, აღნიშნული ორსულების ახალშობილების 1-2%-ს გამოუვლინდება ადრეული ინფექცია B ჯგუფის სტრეპტოკოკით.[6]

ინვაზიური ნეონატალური ინფექციის სიხშირე მნიშვნელოვნად განსხვავდება მსოფლიოს გარშემო და აშშ-ში ბოლო წლების განმავლობაში იკლებს. აშშ-ში, 1999-დან 2005 წლამდე, ადრეული დაავადების გამოვლინების სიხშირე იყო - 0.35 ყოველ 1000 ცოცხალ ახალშობილზე (მშობიარობიდან 0-6 დღე), ხოლო 0.33 ყოველ 1000 ცოცხალ ახალშობილზე მოგვიანებითი გამოვლინების დაავადებისთვის (მშობიარობიდან 7-89 დღე).[3] თუმცა, 2018 წელს გამოიცა აშშ-ს ყოველწლიური ეპიდზედამხედველობის ანგარიში, რომლის მიხედვითაც ადრეული გამოვლინებების შემთხვევათა სიხშირემ დაიკლო 0.25 ყოველ 1000 ცოცხალ ახალშობილამდე, ხოლო მოგვიანებითი გამოვლინების დაავადების სიხშირე გახდა 0.28 ყოველ 1000 ცოცხალ ახალშობილზე. სიხშირე ყველაზე დაბალი იყო 2-დან 4 წლამდე და 5-დან 17 წლამდე ასაკის ადამიანებში - 0.1 შემთხვევა 100000 მოსახლეზე.[7]

ინგლისში საავადმყოფოში დაფიქსირებული ახალშობილთა B ჯგუფის სტრეპტოკოკის შემსწავლელმა ერთმა რეტროსპექტულმა კვლევამ ვერ აღმოაჩინა ინციდენტობის მნიშვნელოვანი ცვლილება 1998 და 2017 წლებს შორის, საშუალო წლიური ინციდენტობით - 1,28 ყოველ 1000 ცოცხალ დაბადებულზე (95% სარწმუნოების ინტერვალი 1,26-დან 1,30-მდე).[8] თუმცა, ეპიდზედამხედველობის მონაცემების ანალიზის შედეგად გამოვლინდა სხვა სურათი: მოიმატა ნეონატალური B ჯგუფის სტრეპტოკოკის ადრეული გამოვლინების დაავადების სიხშირემ- იყო 0.28 შემთხვევა (2008 წელს) და გახდა 0.57 შემთხვევა (2015 წელს) ყოველ 1000 ცოცხალ ახალშობილზე; რაც შეეხება მოგვიანებითი გამოვლინების დაავადებას, ასევე იმატა სიხშირემ- იყო 0.11 შემთხვევა (1991 წელს) და გახდა 0.31 შემთხვევა (2015 წელს) ყოველ 1000 ცოცხალ ახალშობილზე.[9][10] მოგვიანებითი გამოვლინების დაავადების სიხშირის მატება შესაძლოა დაკავშირებული იყოს მაღალი რისკის მქონე, დღენაკლი ბავშვების მზარდ რაოდენობასთან. მაჩვენებლები წააგავს ფინეთის, ნიდერლანდების და ნორვეგიის მაჩვენებლებს. ადრეული გამოვლინების დაავადების სტატისტიკური მრავალფეროვნება შესაძლოა აიხსნას განსხვავებული პრევენციული სტრატეგიებით; აშშ-ში ადრეული დაავადების ინციდენტობამ იკლო 80%-ით (1990-იანი წლებიდან) მას შემდეგ, რაც დაინერგა მშობიარობის დროს ანტიბიოტიკური პროფილაქტიკა B ჯგუფის სტრეპტოკოკის წინააღმდეგ.[6][11] ნაწილობრივ ეს ფაქტი აიხსნება ეროვნული მასშტაბით დაავადების მოხსენების/შეტყობინების გაუმჯობესებითა და სავალდებულო ეპიდზედამხედველობით.

კვლავ ვლინდება განსხვავება ინფექციის სიხშირეებს შორის თეთრკანიან და შავკანიან ბავშვებში, როგორც ადრეული, ასევე მოგვიანებითი გამოვლინების დაავადების შემთხვევაში. აშშ-ს ეპიდზედამხედველობის მონაცემების მიხედვით, 2018 წელს შავკანიან ახალშობილებში ადრეული გამოვლინების ინფექციის შემთხვევათა ინციდენტობა იყო 0.32 ყოველ 1000 ცოცხალ ახალშობილზე, ხოლო თეთრკანიანებში- 0.24 ყოველ 1000 ცოცხალ ახალშობილზე; რაც შეეხება მოგვიანებით გამოვლენილ ინფექციას, შავკანიანებში მონაცემი უტოლდებოდა 0.52 შემთხვევას ყოველ 1000 ცოცხალ ახალშობილზე, ხოლო თეთრკანიან ახალშობილებში- 0.22 შემთხვევას ყოველ 1000 ცოცხალ ახალშობილზე.[7]

არაორსულ მოზრდილებში ინვაზიური ინფექციის სიხშირე მნიშვნელოვნად განსხვავდება ქვეყნებს შორის; თუმცა, ზრდასრულთა B ჯგუფის სტრეპტოკოკული დაავადების მზარდი ინციდენტობა ფიქსირდება მთელს მსოფლიოში. ერთმა მეტაანალიზმა, რომელიც მოიცავდა 1975 წლიდან 2018 წლამდე მონაცემებს, აღრიცხა ჯამური სავარაუდო ინციდენტობა - 2.86 შემთხვევა 100,000 მოსახლეზე ჩრდილოეთ ამერიკაში, სამხრეთ ამერიკაში, ევროპაში, აზიაში, ავსტრალიასა და აფრიკაში.[12] მოზრდილებში კოლონიზაციის სიხშირე მსგავსია ასაკის განურჩევლად, მაგრამ B ჯგუფის სტრეპტოკოკული დაავადება უფრო პრევალენტური და მძიმე ხდება 65 წელზე უფროსი ასაკის ადამიანებში.[12][13]

შეერთებულ შტატებში, არაორსულ მოზრდილებში ინფექცია წარმოადგენს ინვაზიური B ჯგუფის სტრეპტოკოკული დაავადების შემთხვევების უმეტესობას, 2008 წლიდან 2016 წლამდე ინციდენტობის მატებით 8,1-დან 10,9-მდე 100000 ზრდასრულზე.[5] ინციდენტობა უფრო მაღალი იყო მამაკაცებში და გაიზარდა ასაკთან ერთად.[5] საერთო ჯამში, ინციდენტობა შავკანიან მოსახლეობაში მნიშვნელოვნად უფრო მაღალი იყო თეთრკანიან მოსახლეობასთან შედარებით, თუმცა, სიხშირის აბსოლიტური განსხვავება დროთა განმავლობაში შემცირდა და 2016 წლიდან ეს მაჩვენებელი მნიშვნელოვანი აღარ იყო.[5]

ამ მასალის გამოყენება ექვემდებარება ჩვენს განცხადებას