ეგზემა - ახალი ტიპის მკურნალობა

ლებრიკიზუმაბი

ლებრიკიზუმაბმა, ახალმა მაღალი აფინურობის მონოკლონურმა ანტისხეულმა, რომლის სამიზნეა IL-13, აჩვენა სწრაფი, დოზადამოკიდებული ეფექტურობა ზომიერიდან მძიმე ეგზემის მქონე მოზრდილებში.[165] ლებრიკიზუმაბი დამტკიცებულია ევროპაში (მაგრამ არა აშშ-ში) ზომიერი და მძიმე ეგზემის სამკურნალოდ მოზრდილებში და ≥12 წელზე უფროსი ასაკის ბავშვებში სხეულის მასით მინიმუმ 40 კგ, რომლებიც კანდიდატები არიან სისტემური თერაპიისთვის.[166]

ნემოლიზუმაბი

ნემოლიზუმაბი ადამიანის მონოკლონური ანტისხეულია IL-31 A რეცეპტორის საწინააღმდეგოდ. რამდენიმე კვლევამ აჩვენა ქავილის მნიშვნელოვანი გაუმჯობესება პაციენტებში, ზომიერიდან მძიმე ფორმის ეგზემით; გვერდითი მოვლენების შესახებ საჭიროა დამატებითი მონაცემები.[167][168][169][170][171]

ომალიზუმაბი

ომალიზუმაბი ადამიანის რეკომბინანტური მონოკლონური ანტისხეულია, რომელიც ახდენს IgE-ის მაღალი აფინურობის Fc რეცეპტორის ინჰიბირებას. ამჟამად ის დამტკიცებულია ქრონიკული იდიოპათიური ჭინჭრის ციების და საშუალოდან მძიმე ფორმის პერსისტული ასთმის მკურნალობისთვის იმ პაციენტებში, რომელთაც აქთ კანის დადებითი ტესტი ან ინ ვიტრო რეაქტიულობა მრავალწლიანი აეროალერგენისადმი. ერთ რანდომიზებულ, პლაცებო კონტროლირებად კლინიკურ კვლევაში კანქვეშა ომალიზუმაბი მნიშვნელოვნად ამცირებდა ეგზემის სიმძიმეს და აუმჯობესებდა ცხოვრების ხარისხს პედიატრიულ პოპულაციაში, ატოპიითა და მძიმე ეგზემით, საწყის ეტაპზე IgE-ს მიმატების მიუხედავად.[172]

ორიმილასტი

Orismilast, საკვლევი ფოსფოდიესტერაზა-4 (PDE4) ინჰიბიტორი, მინიჭებული აქვს სწრაფი გზა აშშ-ს სურსათისა და წამლების ადმინისტრაციის (FDA) ზომიერი და მძიმე ეგზემის სამკურნალოდ.[173]

რეტინოიდები

პერორალური რეტინოიდები შესაძლოა სასარგებლო იყოს იმ პაციენტებში, რომელთაც აქვთ ტოპიკური მკურნალობისა და/ან ფოტოთერაპიის მიმართ რეფრაქტორული ეგზემა. კოქრეინის ერთ-ერთ მიმოხილვაში აღნიშნულია, რომ არსებობს მაღალი სიზუსტის მტკიცებულება, რომლის მიხედვითაც მტევნის მძიმე ქრონიკული ეგზემის მქონე პაციენტებისთვის ალიტრეტინოინი აუმჯობესებს სიმპტომების კონტროლს. სარგებელი უფრო აშკარა გახდა ალიტრეტინოინის მაღალი დოზების გამოყენებისას.[174] ალიტრეტინოინი აშშ-ში ხელმისაწვდომია მხოლოდ ტოპიკური ფორმულაციის სახით, თუმცა სხვა ქვეყნებში ხელმისაწვდომია მისი პერორალური ფორმაც.

კვების რაციონის ცვლილება

მტკიცებულები არ ამყარებს ბავშვებში ატოპიური დაავადებების პრევენციისათვის დედის დიეტის სპეციფიკურ ინტერვენციებს ან ორსულობის დროს ალერგენებისგან თავის არიდებას. არსებობს გარკვეული მტკიცებულება, რომ მეძუძურ დედებში კვებითი ანტიგენებისაგან თავის არიდება შესაძლოა ამცირებდეს ეგზემის სიმძიმეს ჩვილებში და ასევე ამცირებდეს ატოპიური ეგზემის განვითარების რისკს მაღალი რისკის მქონე ქალების ბავშვებში; საჭიროა უფრო ფართომასშტაბიანი კვლევების ჩატარება.[41] ერთ-ერთ პრევენციულ ზომად მოწოდებულია პრობიოტიკებით მკურნალობა, თუმცა მეთოდის შესახებ ხელმისაწვდომი მონაცემები მწირი ან ძალიან დაბალი ხარისხისაა.[42][43][44] აღსანიშნავია, რომ FDA-მ გამოსცა გაფრთხილება, რომ დღენაკლულ ჩვილებს არ უნდა მიეცეთ პრობიოტიკები ინვაზიური ბაქტერიული ან სოკოვანი დაავადების რისკის გამო.[175]